|
[25] EPISTOLA XXV. Reverendo Domino Decano, ac Cancellario, Magistro nostro eximio, haereticae pravitatis Inquisitori acerrimo RUARDO TAPPERO. Lovanium. Trahit me bonus odor celeberrimi nominis tui ad scribendum Reverendae Dominationi tuae, licet nullis sim praeviis meritis aut officiis Amplitudini tuae commendatus. Non solum autem ad scribendum, verum etiam ad commendandum Pietati tuae, Latorem praesentium, adolescentem haud infelicis ingenii, IOANNEM GUNTHERUM, Dioecesis Misnensis, qui aliquot annis parvitati meae servivit, Vratislaviae, Misnae, Hagenoiae, Wormatiae, ac bis Ratisponae; qui in Philosophiae studiis assecutus est Coloniae quidem Baccalaureatus, Ingolstadii vero Magisterii gradum, verumtamen cupio eum solidiora in Philosophia jacere istic fundamenta, ea quidem lege, ut principale ejus studium sit in sacris literis, successivis autem horis det operam Philosophiae, Historiisque & Chronographiae ac Cosmographiae studiis, ut per ea ad concionandum & Ecclesiae ministrandum paratior fiat. Multa mihi dixerunt de praeclaris in te donis DEI, eruditionisque & probitatis tuae virtutibus R. D. PETRUS MALVENDA, R. P. EVERHARDUS BILLIK Carmelitarum Provincialis, Caes. Majest. Confessor, & filiorum sereniss. Regis nostri FERDINANDI Praeceptor M. Jo. HASENBERGIUS. In primis vero R. P. THEODERICUS LOHER Carthusianus, qui praecipuus mihi auctor fuit mittendi adolescentem istuc potius, quam ad Parisios. Nihil vidi equidem intra multos annos, quo fortius succinctiusque aut gravius, majorique cum auctoritate confutata fuerint haereticorum nostri temporis dogmata, quam factum est per xxxii. articulos Lovaniensium Theologorum, quorum te praecipuum fuisse dicunt authorem. Quid Teuthoniae in eos expuerint (salva reverentia) Argentinenses novi Theologi, scio Rev. Dom. T. compertum esse, ex interpretatione Doctiss. Viri BILLICHII supradicti. Furiosas LUTHERI in eosdem propositiones & Latine & Germanice saepius editas LXXV. numero, credo R. D. T. non latere, sed jam pridem visas esse. Alias vero ejusdem propositiones non impressas, sed scriptas, communicavit mihi nuper Ratisponae Vir Egregius D. JOANNES OBERNBURGER, Caes. Majest. in Germanica Cancellaria Secretarius. Quas nunc mitto, si forsitan R. D. tua eas antea non viderit. Operum illius editus est Wittenbergae primus tomus, volumen bene magnum; in quo varia continentur scripta, trium duntaxat annorum, nempe Annorum Domini xvii., xviii. & xix. ferunt enim Islebii in cistula quadam habuisse librum, in quo scripserit nescio quid, quoties aliquid otii nactus esset, quando erat ibi propter Comitum de Mansfelt componendas discordias. Dolet mihi maxime, propter unius Apostatae furores & insanias, ita confundi, atque in extrema non solum corporum & rerum temporalium; verum etiam tot millium animarum pericula impelli totam fere Germaniam. Bene tamen spero. Caesaris nostri virtute, pietate & potentia hanc rerum turbationem in prosperum, DEO propitio, finem perductum iri. Accedet Sanctis ejus conatibus Generalis Concilii auctoritas ac strenua diligentia: de cujus quinta sessione hesterno vespere literas e Tridento recepi, quod prorogata sit usque ad feriam quintam post festum S. Iacobi. Decrevit jam dudum Reverendissimus D. meus, Episcopus Eystetensis illuc mittere parvitatem meam, mox post aestivos calores, si DEO placuerit, quanquam nullius ibi momenti esse queat mea praesentia. Sed prolixior sum quam ad R. D. T. decet. Ignosce obsecro, & hanc meam confidentiam boni consule, Vir Clariss. Ex Eystet civitate, Die XV. Julii. MDXLVI. R. D. T. ad quaevis obsequia devotus ac promptus Acta Colloquii posterioris Ratisponae habiti, credo R. D. T. jam dudum cura R.D. Malvendae recepisse Latine impressa. Quorum nullum adhuc recepi exemplar, quod ex certis causis & respectibus Illustris Dominus GRANVELLA noluit ea evulgari aut divendi: ego illum in Germanicum ex scripto quodam exemplari transtuli, quae Typographo tradidi Ratisponae antequam abivi, ut Ingolstadii excudantur in eadem officina. |